政情：梁福元批無綫劇 涉醜化原居民
新界鄉紳向來「與世無爭」，但係無綫電視上月播放嘅某套電視劇竟然辣興新界人，激到十八鄉鄉事委員會主席梁福元紮紮跳，月初更以新界傳統權益委員會主任委員身份，去信通訊事務管理局投訴無綫電視。
劇集提到一宗爭奪撫養權官司，律師指原居民父親爭取個仔撫養權，係為咗他日可以出售個仔嘅丁權圖利。梁福元指丁權係男丁成年後、有地建屋先叫做正式享有丁權，任何人、即使係父親都冇權代為出售圖利，佢批評劇集扭曲原居民家庭親情倫理同社會價值觀，兼涉嫌醜化原居民喎。
鄉局為發叔出語錄
另外，鄉議局研究中心近日終於「有嘢做」，中心主任、鄉議局執委薛浩然尋日趁鄉議局召開執委會，宣布將會為主席劉皇發（發叔）出語錄，名為《為誰風露立中宵－劉皇發言論集》。言論集輯錄咗六十篇發叔多年來出席重要場合嘅發言。雖然言論集係用鄉議局資源幫手搞，但發叔就話係佢自資出版嘅。