政情：切除白內障 姚思榮冇埋老花

唔少立法會議員都因為近視深或有老花而要佩戴眼鏡，但平日經常以四眼示人嘅旅遊界姚思榮近日就突然唔再戴眼鏡，望落仲好似後生咗十年添，莫非佢想學後生仔女改戴隱形眼鏡扮後生？姚思榮話佢雙眼一直好健康，只係有啲老花，但上月做例行眼科檢查時發現患上初期白內障，醫生建議即時做白內障切除手術，點知手術後連老花都消失埋，唔使再戴眼鏡，實在喜出望外。