中環出更：廿四孝爸爸張俊勇幫囡囡搵番愛貓
俗語有話：「養兒方知父母恩」，所以愈嚟愈多組織宣揚敬老精神。香港普寧同鄉聯誼會（聯誼會）早前都舉行咗一場敬老揚孝午宴，中華總商會會董張俊勇（Thomas）同佢爸爸張成雄都有出席。卓妮見Thomas好似好攰咁，原來幾日前佢屋企唔見咗隻貓，搞到太太及兩個囡囡喊晒。當日凌晨一點幾，Thomas靈機一動上屋企天台睇吓，終於畀佢搵番。唔夠瞓，梗係攰喇！
Thomas話屋企養咗三隻貓，走失嗰隻只得八個月大，形容囡囡同太太「喊到傻晒」，佢都好頭痛。後來佢諗真啲，隻貓一係走咗出去，一係上咗天台，估唔到真係畀佢喺天台搵番。囡囡梗係開心到飛起，仲覺得爸爸好勁添！佢講笑話，呢啲咪叫做廿四孝老竇囉！
許義良：孝親敬老係做人基本
轉頭見到油尖旺區議會主席葉傲冬，佢仲未有子女，但就話唔使等到自己做爸爸，都知要報父母恩。記得細個時，做過市政局議員同油尖旺區議會副主席嘅爸爸葉國忠成日好忙，當時佢有啲怪爸爸點解唔多啲陪家人。直至爸爸過身、自己都做埋議員之後，先至體諒爸爸當年好難兼顧工作同家庭。所以如果第日自己有機會做父親，就會抽多啲時間陪仔女喇！
潮屬社團總會主席陳幼南都有出席，事關普寧都係佢哋嘅屬會之一。聯誼會會長許義良同秘書長陳榮欣就講起，孝親敬老係做人嘅基本，所以舊年佢哋上任後，就首次舉辦敬老揚長者宴，今年係第二次舉辦，有近八百幾人參與，當中八成係普寧鄉親。睇見老人家咁開心，幾辛苦都值得。
卓妮