政情：王國興醫肚 10分鐘搞掂
拉布議員其中一式絕招，就係瘋狂響鐘點算法定人數，一來可以拖吓時間，甚至引發流會，二來可以玩殘班建制派議員，搞到佢哋一餐飯要分開幾次食。我哋早幾日喺立法會大樓對面嘅中信大廈某快餐店，見到工聯會議員王國興（阿王）一支公喺度食晏，前後用咗約十分鐘就食飽抹埋嘴走人。
我哋事後問番阿王，佢話其實早喺立法會爆發拉布戰前，自己已養成「極速」醫肚嘅神功，一來喺快餐店食嘢，費時食咁耐阻住其他人，二來亦可親身體驗吓啲基層打工仔平日無啖好食嘅生活。問及曾否因食飯食得太快令腸胃不適，阿王就話未試過，但係拉布戰令佢要由朝坐到晚，就搞到有腰痛問題嘅佢叫苦連天。
（溫國佳攝）