中環出更：立會宴區佬 新界幫紛缺席
好多人都話，今時今日行政同立法部門嘅關係惡劣，原來地區同立法嘅關係似乎亦唔太好。事關立法會每年都會宴請十八區區議會正副主席，尋日立法會照舊準備酒席請客，點知原本應有三十六位貴賓出席，結果只得十幾人，其中新界九個區議會嘅主席同部分副主席仲齊齊缺席添！
「去西環食好過添馬艦」
消息人士話，班新界區議會主席去咗西環食飯，主題係傾地區即將舉行嘅一連串活動。有人仲講到明去西環好過去添馬艦，因為去到添馬艦都只係吹水，冇乜作為喎！
至於立法會午宴情況，據聞出席嘅主要係建制派立法會議員，而且主人家人數係客人三倍添。佢哋喺會上除咗交換卡片、傾閒偈之外，亦有講到拉布嘅問題。聽聞有立法會中人關注立法會拉布嘅不良習慣，似乎有蔓延至區議會趨勢，未做過區議員嘅立法會議員就不斷咁八卦有關區議會拉布嘅情況。佢哋好傾唔傾，傾埋呢啲浪費公帑嘅拉布經，唔怪得連新界幫都唔想去喇！
卓妮