政情：高官離「地氣」嫻姐邀落區 賴低克儉

不滿吳搵人代答

嫻姐唔係得把口，佢一輪嘴細數邀官落區進展，例如六月就搵咗運輸及房屋局局長張炳良探訪板間房住戶，之後仲邀請食物及衞生局局長高永文見市民，傾吓急症室服務不足嘅問題。至於教育政策又點呢？嫻姐就好勞氣話，仲諗緊係咪搵教育局局長吳克儉（吳得掂）。

嫻姐指有唔少家長好關注十五年免費教育政策，但點解邀請吳得掂落區要左思右想呢？嫻姐解畫話，吳得掂平時喺立法會答議員問題時，成日搵教育局嘅甲、乙、丙、丁代答，如果搵佢落區又係咁，冇乜意思，不如直接搵副局長楊潤雄或常任秘書長謝凌潔貞好過。

講起副局長，自不然諗起最近因為去咗立法會冇人識，結果「一炮而紅」嘅商務及經濟發展局副局長梁敬國（Godfrey）。

為梁敬國抱不平

嫻姐為Godfrey抱不平，話Godfrey好熟書，對於推動街頭經濟好熟悉，唔明白點解立法會主席會唔識人喎。嫻姐又逐一點評班高官，大讚高永文最接近「地氣」，佢嘅副手食物及衞生局副局長陳肇始就好勤力，而剛上任冇耐嘅發展局政治助理馮英倫最醒目，對於地區政策一講就明。

近日澳門市民成功促使澳門政府撤回建議高官離職補償及特首任內享刑事豁免權嘅「離補」法案事件，引起各界高度關注。嫻姐話，社會有啲價值觀係不容踐踏，就算市民幾支持個政府，一旦去到某個極點就會反抗。又話澳門嘅工會其實仲好反對政府輸入勞工，因為搞到工人雖然有工開但工資好低，所以認為港府唔應該參考新加坡輸入百幾萬外勞嘅做法喎。嫻姐咁講，莫非想警告港府咪再提輸入外勞，否則佢都會上街？