中環出更：皇仁校友 元創方懷舊
上環創意產業地標「PMQ元創方」尋日出現咗一班西裝骨骨嘅男士，佢哋無懼三十幾度高溫，意興甚濃周圍逛，原來呢班都係皇仁書院校友，佢哋專誠返去參加導賞團，事緣元創方嘅所在地係皇仁書院前身中央書院。卓妮見身兼皇仁舊生會名譽顧問嘅科技大學校長陳繁昌攞住相機不停咁影，佢話諗起當年同一班同學自製收音機，啟發咗佢嘅科研夢，仍十分回味。
陳繁昌話，當年佢係中六插班升讀皇仁，雖然只係讀咗兩年，但對母校嘅感情深厚，今次特登返去尋根。陳繁昌諗起當年歲月話，佢啱啱入學時，同學都唔介意佢係新丁，大家一齊玩一齊學習，最難忘係同一班同學利用簡單物料自製收音機，對佢日後實現科研夢有好大影響。所以佢寄語香港人，應該抱住呢種皇仁精神，接納同包容新來者。
黎慶寧與父亦是同門
久未露面嘅保安局前局長黎慶寧都喺度，佢自爆佢爸爸曾經喺中央書院上過堂，兩父子都係皇仁仔，對保育皇仁歷史亦十分上心。黎慶寧話，○六年由澳洲返港居住，獲邀參加皇仁嘅保育工作，試過喺儲物室搵到好多歷史文物，包括試卷、舊相及書籍等等，佢希望可以將呢啲瑰寶好好保存，等後人了解歷史，皆因「忘記歷史只會重複犯錯」喎！
高唱校歌展母校精神
難得校友回巢，皇仁師生亦出動招呼。而唔同年代皇仁仔聚首一堂，梗係要展示吓皇仁精神，陳繁昌帶領大家高呼三聲，就大大聲唱校歌，恍如回到過去，感覺後生幾歲添！
卓妮