中環出更：陳智思自爆曾被執法機關查
有「公職王」之稱嘅行政會議成員陳智思成日獲政府委以重任，個底一定白過白開水，點知佢尋日出席廉政公署舉辦嘅青年高峰會時，竟自爆話自己十四年前都被執法機關查過，仲搞到佢非常痛苦咁話。
下屬犯罪連累老闆
話說○○年，陳智思名下公司一位高級行政人員犯咗刑事罪行，結果連累身為老闆嘅陳智思被查。雖然佢冇講畀邊個機構查，唔知係廉署定係警方，但佢話足足查咗兩年，令佢成日瞓唔安，食唔落，發夢都驚第朝上咗各大報頭版，最後佢當然係冇事啦。
今次事件教訓佢千祈唔好乜嘢都視為理所當然，你行得正、企得正，唔代表你身邊嘅人都係，佢哋隨時因為抵受唔住誘惑而犯法，仲會連累到人添！
講番高峰會現場，警務處前「一哥」李明逵都有出席。佢勸勉青少年，錢唔係最重要，錢買唔到開心同健康，做人最緊要係誠信。有青少年好關注貪湯前廉政專員湯顯明事件對廉署嘅影響，陳智思嗰句「做人千祈唔好乜都視為理所當然」，唔知係咪暗示咪以為做得廉政專員就一定廉潔呢？
卓妮