中環出更：港版米芝蓮秘選識食客
茶記嘅豆腐火腩飯被喻為「男人的浪漫」，可惜外國男人似乎唔係好明白。為抗衡法國《米芝蓮指南》以西方味蕾操控本土美食命脈，香港五大飲食業商會聯手舉辦《香港味之年賞》，公開招募港產識食之人任神秘食客，由港產舌頭重掌美食話語權，尋日仲大擺「龍門宴」，邀請各路人馬接受十人顧問團味之考驗，以便選出識食之人做神秘食客。
呢場「龍門宴」喺稻香訓練酒樓場地舉行，出席嘅顧問團成員包括飲食界立法會議員張宇人（Tommy）及稻苗學會主席黃傑龍（Simon）。
張宇人蒙頭似拉登
尋日各神秘食客候選人會見傳媒，為防尊容曝光而戴上眼罩，Tommy早有預備搞氣氛，戴上疑似飛虎隊的攀山頭巾連口罩，仲加上一副黑超，造型勁搞笑，被笑似拉登，有人仲建議佢改名做拉丁添！
Tommy話，今次唔係要搵識食好嘢嘅食客，係要搵「識食之人」，所以菜式未必用上高貴食材，或者複雜煮法，要食出當中特色，就要考候選食客嘅真功夫。好似頭盤沙律，唯一亮點只係改用紅酒醋，其餘食材同普通沙律無異。
有份主理今次龍門宴嘅Simon就話，神秘食客應該用專業及精準字眼點評每道菜，如果佢哋好似部分飲食節目主持人咁，淨係識話「好食」、「好有口感」，一定會出局。Simon又教路，好似食牛扒咁，識食之人至少會形容吓塊扒來自隻牛嘅邊個部位、紋理同煮法。
下月暗訪200間食府
尋日共有一百四十名神秘食客候選人，即場試食九道唔同菜式，仲要就每道菜回答唔同問題，以便顧問團其後挑選出最識食嘅三十至五十人，下月起暗訪二百間「心水優質食府」進行神秘試食。神秘食客完成試食任務後，獲食客畀最多「讚」嘅食府將會輯錄喺年底出版嘅《香港味之年賞二○一四》飲食指南內。
卓妮