政情：今日你上鏡︰高永文勁歌熱舞撐饑饉
食物及衞生局局長高永文（前排左）近排身體抱恙，聲沙咗一段時間，但係佢仍然好勤力出席活動。尋日烈日當空下，高永文戴住遮陽帽出席饑饉三十開幕禮，期間唔止帶頭宣讀「絕食」三十個小時嘅饑饉誓章，仲同年輕人又唱又跳，喺現場播放非洲音樂帶動下，跟住節奏咁打大脾，交足功課。
高永文自從上次立法會開特別財委會，連續講咗三、四個鐘頭之後，就失晒聲。雖然近日好番啲，但係講嘢仍然陰聲細氣，睇落仲清減咗。咁佢真係要禁食三十小時？高永文就話，期間會食流質嘢嘅。奉勸高醫生如果真係要「絕食」，千祈要小心身體呀！