政情：黃傑龍慘食「13座」檸檬
北角街頭小食「十三座牛雜」已經結業，相信佢哋嘅牛雜令唔少街坊回味無窮。本身都從事飲食業嘅叙福樓集團執董黃傑龍（Simon）見到連食過翻尋味嘅舖頭都要結業，內心不是味兒，所以約咗「十三座牛雜」老闆湯建業兩兄弟食飯，睇吓有冇合作機會。不過，由於人哋已經決定去台灣大展拳腳，所以Simon最後都係「食檸檬」收場。
尋合作未死心
Simon喺社交網站留言話，前日同湯建業兩兄弟食飯，主要想湯氏兩兄弟可以繼續喺香港開業，佢仲可以同湯氏兩兄弟合作，幫佢哋搵舖位，同埋畀佢哋用公司嘅中央工場咁話。
不過，「神女有心、襄王無夢」。湯氏兄弟坦言，香港面對舖租貴、食材貴及請人難等問題。所以就算Simon盛意拳拳，佢哋似乎都不為所動，仲話因為應承咗屋企人，所以都係要先去台灣開業咁話。不過，Simon就有啲死心不息，喺社交網站出貼，話如果大家畀一萬個「like」（讚好）佢，話唔定可以說服湯氏兩兄弟留港發展喎。