政情：張仁良借外力改革教院

自爆校內存拒變革勢力

Stephen由浸會大學工商管理學院院長過檔教院先至七個月，但好似已過咗蜜月期。佢意有所指話，校董會好似上市公司，而校董就等於變革者或企業家，通常學校都唔鍾意改變，包括香港教育學院在內，不過作為校長唔應該怕接觸新事物，變革路程亦唔可以有局限。

台下聆聽嘅係來自唔同學校嘅校董，即係聘用教院畢業生嘅僱主，Stephen趁機提及教院曾經向各中小學發出問卷，調查各學校未來偏向聘請啲咩類型嘅教師，結果收回一千多份問卷。教院未來幾日會完成分析，再對教師培訓課程進行改革，務求為學術界提供啱用嘅教師。Stephen咁講，即係引入外力向學生及老師施壓啫！