政情:阿松疑似發表參選宣言

政界廣傳有意競逐下屆特首寶座嘅前財政司司長梁錦松(阿松),早前聲稱自己「唔信」有關傳言,又推說是否參選要問過老婆伏明霞先,但尋日佢獲邀以金融專家身份、喺基本法推廣督導委員會舉辦嘅研討會上致詞時,就似係闡述佢嘅競選與治港理念,多過講《基本法》同政改。記者多次問佢究竟係咪想參選特首,阿松都冇正面否認。一向管選舉開支管得好嚴嘅選舉事務處,係咪應該開始同佢計數呢?

尋日獲邀喺會上致詞嘅四位嘉賓,發言內容都聚焦喺《基本法》同特首普選,惟獨獲安排坐喺講台正中間嘅阿松,演詞內容就廣泛豐富得多,包括意有所指咁呼籲政治人物要識得「退一步海闊天空」;大讚祖國對香港照顧有加,其中CEPA同個人遊當年正係由佢負責;又警告照搬西方普選制度,會令香港變成福利主義,當權者只懂減稅同增加政府開支,好易變到部分歐洲國家咁債台高築,令人覺得佢係數緊自己當年大力削支滅赤嘅政績,多過講解香港實行普選嘅好處。

冇否定競選與否

會後傳媒多次追問佢係咪想選特首,阿松都只係不斷重複咁話,每一位市民都應該齊心,喺唔同崗位服務社會,又叫大家唔好被呢類議題拉開政改討論,始終都係冇否定會參選特首囉!

第一手消息請下載on.cc東網iPhone/iPad/Android/Windows Phone Apps