政情：公民講場︰財爺死守金庫 自製財赤樽頸

財政司司長曾俊華（鬍鬚曾）親自揀蟀嘅長遠財政計劃工作小組，尋日終於公布詳細報告，為鬍鬚曾恐嚇香港最快七年後出現結構性赤字嘅預言解畫。小組堅持要根據《基本法》第一○七條，令政府開支與本地生產總值（GDP）的增長相適應。不過，前行政會議成員林奮強就唱反調，狠批預算案冇亮點，仲話要求公共開支維持GDP百分之二十嘅水平係自製樽頸，政府「要使唔使」，搞到社會需要「擔櫈仔」。佢仲預言香港未來係「結構性好景」，應該盡快興建酒店、醫院喎！香港未來係咪「好景」暫時講唔埋，但鬍鬚曾為死守金庫而自設財赤樽頸，就係鐵一般事實喇！