政情:中環出更:蔡陳淑儀愛駒讀音考起朋友

沙田馬場尋日非常熱鬧,皆因其中一場賽事係仁愛堂盃賽,一眾仁愛堂董事局嘅核心成員未開賽之前就已經抵達馬會廂房,仲搞咗個以盛裝舞步同綠色為主題嘅午宴添,個個副主席同總理都悉心打扮為賽事打氣,而玩問答遊戲嘅時候,總理蔡陳淑儀同佢老公蔡志良嘅愛駒名稱「駔驍駿驥」嘅讀音仲考起唔少朋友,引起大家熱烈討論。

仁愛堂尋日有場盃賽喺沙田馬場舉辦,一班成員一早就去到撐場,當中唔少仲係馬主嚟,好似蔡陳淑儀咁,佢隻靚馬個名就考起大家喇,至於點解佢會幫馬仔改個咁嘅名?

「駔驍駿驥」解作良駒

蔡太話佢有一排得閒揭字典,無意中就俾佢發現咗「駔驍駿驥」呢四個字,全部都係良駒咁解,所以就幫隻馬改咗呢個名喇,點知好多馬評人都唔知個名點讀,所以佢就同老公一齊搵咗個教授去確認真正讀音,原來駔讀「莊」,驍讀「僥」,僥倖嘅僥。

即將喺月底卸任仁愛堂主席一職嘅陳鄭玉而就喺活動上總結過去一年感受,佢話自己以前做慈善只係識捐錢,做咗主席先感受到自己一手一腳、親力親為去幫人嘅感覺。雖然佢從未試過咁忙,甚至犧牲咗同家人相處嘅時間,之前仲因為抽唔到時間而拒絕咗同老公一齊去旅行,好在老公好體諒,嚟緊卸任之後可以補番去喇。

同場仲有新界鄉議局主席發叔劉皇發細仔劉業光及太太Michelle、跟尹光學唱歌兼致力慈善服務嘅何國材及陳麗珠等仁愛堂總理,聽聞佢地仲籌備緊新一屆仁愛堂極地之旅,帶領學生遊走亞馬遜上游流域,發掘熱帶雨林近年因發展帶來嘅改變,推動年輕人思考保育問題,培養佢地對社會嘅責任感。

卓妮

第一手消息請下載on.cc東網iPhone/iPad/Android/Windows Phone Apps