政情：中環出更：新婚翌日 陳百里即返工
商務及經濟發展局政治助理陳百里前日同拍拖四年幾嘅女朋友李淑媛（Michelle）拉埋天窗，局長蘇錦樑捧場之餘仲幽默致詞，呼籲佢快啲為人口政策作貢獻，仲同立法會議員謝偉俊齊齊高歌《Five Hundred Miles》祝福一對新人。不過，百里尋日並冇即時起行去度蜜月，反而係立即返工聽財爺發表財政預算案。
老婆體諒 暑假補度蜜月
百里同Michelle於二○一○年一個科技活動上認識，二人一拍即合。百里話太太善解人意，就算唔去度蜜月掛住工作，太太都非常體諒佢喎。由於太太係河南省信陽人，所以百里之後會攞假返信陽再擺一次酒，預計暑假先會去度蜜月。
雙方父母似乎亦對一對新人頗為滿意，外父畀足女婿一百分，但老爺就話新抱暫時得九十分，咁餘下十分去咗邊？百里嘅爸爸話，如果抱埋孫就一百分喇，因為囝囝係獨生子，依家已經三十八歲，愈快生仔愈好咁話。當晚仲有好多政商界高官名人到賀祝福，包括發展局局長陳茂波、觀塘區議會主席陳振彬等，場面好熱鬧。
卓妮