政情：中環出更：滑雪飲茅台莊家彬識歎
茅台之友協會早前舉辦一年一度嘅香江之夜，愛好摸杯底嘅城中名人齊去豪飲歡聚。協會青委主任莊家彬（Albert）最唔話得，喺晚會上分享早前同細佬莊家豐去日本滑雪時，趁機帶支茅台喺雪地飲，仲留影見證呢一刻，唔講仲以為佢哋帶茅台去挑戰珠峰添！
當晚去暢飲嘅名人好多，包括協會監事長楊孫西、副會長吳永嘉（Jimmy）及施榮忻，仲有好多後生靚女，包括青委成員兼「手套大王」詹氏第二代詹嘉莉（Kelly）、漢生堂董事長李嘉音嘅囡囡李玥及陳丹丹等人。Kelly話，最近忙於喺深圳開拓美容事業，經常遊走中港兩地。
酒香撲鼻 名人「唱」聚
港區全國人大代表馬豪輝都去趁熱鬧，佢盛讚茅台酒香撲鼻，令人難以抗拒，最特別嘅係酒杯纖細，飲用時可以杯起杯落，夠晒豪邁咁話。
Jimmy話，最近受到內地吹起節約風影響，原本被搶高嘅茅台價格大幅回落，由最高時三千八百元一支，跌至二千四百元。茅台跌價對香港都冇壞，因為過去太多內地人來港買返去送禮，令到有心品酒嘅人卻步，依家有唔少港人趁跌價開始買嚟飲，都叫「因禍得福」嘅。
講到晚宴嘅高潮莫過於楊孫西同福建幫兄弟施子清及盧文端，帶頭同協會核心成員上台高唱閩南名名曲《愛拼才會贏》，令現場氣氛高漲。現場賓客意猶未盡，一口氣「安哥」兩次，眾人藉住幾分酒意高歌，非常盡興。
卓妮