政情：樹根練氣功 肯定健康咗
氣功係中國源遠流長嘅傳統文化，唔少人都會學習氣功強身健體，原來立法會議員鍾樹根都有學氣功，佢話學氣功之後，唔單止令困擾佢二十年嘅尿酸痛風問題得以紓緩，就連鼻敏感都好咗好多，呼吸又暢順咗，甚至連講嘢發音都正咗，唔再怕被人話佢「肯肯定」講粗口。練氣功醫頑疾就聽得多啫，連講粗口都醫埋真係第一次聽喇。
樹根尋日出席灣仔伊利沙伯體育館舉行嘅「世界氣功推廣日——早日認識氣功」活動啟動禮，原來佢大半年前跟朋友搵氣功師傅玄武派第十四代傳人黃玄來道長（黃師傅）學氣功。佢話鍛煉後先明白其實人體入面係有一道氣場，練氣功係對身體有好處。佢成日都要出街食飯應酬，搞到有尿酸問題，學氣功一個月左右，痛症問題就冇再復發，真係神奇。
「身心放鬆 咩都走晒出嚟」
黃師傅就話，唔少都市人都會有病痛，只要用心用時間練氣功係可以強身健體。佢又話任何人都可以產生氣感，練習時可以諗吓名山大川，只要放鬆就得喇。黃師傅仲提醒大家︰「唔係淨係身體放鬆，內心都要放鬆，咁就咩都走晒出嚟。」