政情：貪曾鬼祟現長洲 密會陳日君?
東方報業集團前年二月獨家揭發「貪曾」前特首曾蔭權爵士連串貪腐醜聞，至今已接近兩年，但仍未見廉政公署採取任何行動。多得廉署歎慢板，貪曾前日就好有雅興同太太曾鮑笑薇一齊去咗長洲吃喝玩樂，全程有兩名警方保護要人組（G4）警員陪同，繼續浪費公帑，兼夾表現鬼祟。其後行藏敗露，佢更疑似指使兩名G4乘坐普通渡輪離開，企圖調虎離山引開記者。最巧合嘅係，同貪曾關係密切嘅天主教港區前主教陳日君樞機，亦喺同一時間現身長洲，令人聯想兩人係咪刻意遠赴長洲，秘密會面。
籲勿上載合照
前日有讀者向我哋報料，話見到貪曾夫婦早上現身長洲一間茶餐廳食早餐，但貪曾專揀背向門口嘅座位，驚人行過見到佢，又多番叮囑同佢合照嘅店員勿將相片放上網。到臨近中午時，佢哋再轉往一間知名甜品店想買甜品，點知「摸門釘」，因為間舖頭當時根本未開門。記者之後立即喺長洲展開大搜索，但已經唔見貪曾夫婦蹤影，反而撞到「搞事四人組」成員之一、外號「政治主教」嘅陳日君，唔通佢哋啱啱密會完，商討點樣繼續喺香港政壇搞搞震？記者點問陳日君，佢都當聽唔到，但其後據聞佢原來係出席當地一項教會活動。
記者之後先後碰到跟隨貪曾去咗長洲嘅兩名G4，其中一人喺下午時分，手持兩袋外賣食品，與同袍乘坐普通長洲渡輪離開，但船上就唔見到貪曾夫婦。渡輪抵達中環碼頭後，貪曾夫婦突然現身與G4會合，然後登上一輛政府車輛揚長而去。唔知貪曾夫婦係咪又再乘坐富豪遊艇自行往返長洲呢？
網民鬧爆 促盡快捉落鑊
貪曾夫婦曾經光顧嘅茶餐廳女店員透露，佢曾經與貪曾合照留念，惟對方千叮萬囑佢唔好將相片放上網。然而天網灰灰、疏而不漏，其後有網民將一張貪曾食早餐時嘅相片放上網，顯示貪曾當時坐喺一個背向茶餐廳門口嘅座位。相片旋即引來大批網民留言，狂轟貪曾「貪到床周（長洲），作S（死）」、「唔好比（畀）佢出嚟害人」、「要佢入得吾（唔）出得」、「在任五年，未加建過一間公屋！」等等，當中夾雜唔少粗口。
有網民又不滿廉署調查多時仍未正式拘捕佢，希望廉署趁今年成立四十周年，好似當年「反貪污，拉葛柏」咁，從速將呢位「香港第一貪官」繩之以法，「省」番靚「貪湯」前廉政專員湯顯明打爛嘅金漆招牌喇！