政情：廉署展出貪湯「罪證」屏風
「貪湯」前廉政專員湯顯明喺任內豪使公帑酬酢、送禮同外訪，令佢成為第一位「廉署一哥」被調查之餘，亦打爛廉政公署多年建立嘅金漆招牌。適逢今年係廉署成立四十周年，為咗挽回聲譽，舉辦開放日盡晒威水史，部分「咸豐年」巨貪案證物首度曝光，例如葛柏「收片」數簿等。
不過，無獨有偶，貪湯收禮「罪證」之一、內地最高人民檢察院○七年送贈嘅二十萬元巨型屏風都有同場展出，唔知喺咪暗示貪湯已經等同葛柏呢？
可睹葛柏數簿
廉署本月十五、十六、廿二同廿三日喺北角總部大樓舉辦開放日，五千三百張門票已經派晒，公眾可以參觀盤問疑犯嘅錄影會面室、列隊認人室同槍械，亦可以喺展覽廳睇到一啲從未曝光的證物，例如七十年代前總警司葛柏三本數簿，詳細寫低當年港九新界嘅賄款，連七七年前港督麥理浩向貪污警察頒布特赦令嘅原文，公眾都可以睇到。
另外，展覽廳門口右手邊都有樣嘢值得公眾留意，就喺內地最高人民檢察院○七年送的「報喜圖」巨型錦繡屏風，足足值成二十萬元，堪稱貪湯用公帑送禮收禮、喺內地拉關係嘅最大證據之一，獲參觀門券嘅市民就不妨細心欣賞吓喇。