政情：公民講場：溝通當干預 泛民雙重標準

立法會早前喺討論是否運用特權法徹查免費電視發牌一事期間，有建制派議員自爆曾經有中聯辦官員喺投票前接觸佢哋，泛民主派尋日喺大會提出口頭質詢，批評中聯辦粗暴干涉香港事務，公民黨毛孟靜直斥政制及內地事務局局長譚志源縱容中聯辦干擾香港事務嘅行為可恥。但譚志源就反駁毛孟靜話，立法會主席曾鈺成幾個月前亦曾經邀請中聯辦官員去立法會午宴，相信議員可以接受呢種意見交流模式。佢又話如果議員們想知道中聯辦有無影響建制派嘅投票意向，直接問番當事人就最清楚喇。一時願意坐低同場食飯，轉頭又批評正常嘅溝通係粗暴干預，毛議員都好難捉摸喎。