政情：機頭 內鬥為 機地
機場管理局（機管局）主席張建東（Marvin）同董事局成員羅康瑞（Vincent）因為機場島上土地用途問題，因而喺會議上吵大鑊，最終Vincent辭去基建規劃委員會主席一職。據機管局中人透露，今次紛爭並非兩人有過節或怨恨不和，其實Vincent想有關土地用途盡快拍板，係想幫特首梁振英（CY）「搵地」，等CY喺明年一月宣讀施政報告時多項政績，可以對外宣布大幅增加商業用地面積，估唔到一切紛爭源自一個「地」字。
話說CY委任Vincent入機管局，主要係想借助佢熟悉地產背景，大力發展機場島上未開發嘅用地，以配合現屆政府「全民搵地」嘅口號。本來鄰近亞洲博覽館、佔地十五公頃嘅高爾夫球場的確係絕佳商業用地，但機管局董事局大多數人，包括Marvin都認為，一旦興建第三條跑道，呢塊用地必須留作興建配套設施，所以機管局一早有共識，機場北商業區有可能縮至六、七公頃，該地用途更需以第三條跑道利益行先。
不過，加入機管局唔夠一年嘅Vincent，就經常問點解一幅咁高價值嘅地皮要興建車廠，又嫌機管局管理層處事效率唔高。
據機管局中人透露，Vincent同CY想法極相似，認為機場北應該「地盡其用」，興建大型商業城專做遊客生意，Vincent最近兩個月先至要求董事局盡快拍板興建商業城。不過，一班董事擔心興建商業城後，第三條跑道嘅環評報告又要推遲半年，分分鐘影響跑道落成日期，到時因小失大就好唔抵喇。
傳性格不合積怨近年
董事局中人爆料，其實兩人不和唔多唔少都同性格有關，有人形容其中一位火爆唔聽意見，另一位就公子性格唔理人感受，導致經常喺會上針鋒相對，今次搶地事件，某程度上都係將過往一年嘅磨擦一次過爆發。話時話，今次Vincent辭去基建規劃委員會主席，係咪意味爭地爭輸咗呢？有講法話未必係咁，一來機管局講明有關土地用途未有最後定案，二來Marvin早前獲續任主席一年，都係CY拍板，相信事件仍有彎轉嘅。