中環出更：區詠芷批貪曾搞衰環保
環保團體出身嘅區詠芷做咗環境局政治助理後，幫港府力銷擴建堆填區等政策，可惜環團都唔多撐呢位老友。區詠芷尋日就大吐苦水話，其實今屆環境局班子一上場，就推出垃圾按量徵費諮詢，又擴大膠袋徵費等幾個污者自付計劃，真係落心落力o架，但點解仍有咁多人質疑環保政策推得咁慢？皆因前朝政府不濟，無好好落實環保政策，令現屆班子好難做，講到尾都係貪曾累事。
區詠芷尋日出席城市大學論壇時話，環保減廢藍圖十幾年來都無變過，可惜前朝政府不濟，更試過提出用郊野公園土地擴建堆填區，惹來民情反彈，拖慢晒進度，搞到依家變咗「垃圾圍城」。
佢話自己入環境局一年多，局方已經推出三條污者自付草案，想像如果呢三條草案係前朝政府推出嘅話，相關政策早就落實咗，唔使等到今屆班子做到隻積咁。
主持人問佢有無後悔入政府呢個「熱廚房」時，區詠芷只係笑話上任以來擴闊咗眼界，至於環團對政府支持度夠唔夠，區詠芷就拒絕比分數，話環團都有分深綠同淺綠，唔能夠一概而論。
卓妮