渡海濠情：物價飛漲 老婆難娶
內地有調查指近年剩男人數大增，可能同聚老婆嘅成本不斷上升有關，而有媒體公布咗「內地十大城市娶老婆成本排行榜」，深圳位居首位，就算有兩百萬都娶唔到老婆，嚟自凱旋桑拿嘅圈圈就話兩百萬平咗啦！
禮金回饋
圈圈話：「最近我有兩個姐妹出嫁，兩個嘅老公都要花兩百萬以上，單係買層樓，就要百幾二百萬，我當你只畀三成首期，其餘月供，首期都六七十萬唔少得，另外新居裝修，十零廿萬唔少得，家居電器又十萬八萬，單係住家都已經過百萬，之後另一筆最大花費就係禮金，家陣做岳母都好大方，唔會開天索價，但十零廿萬總唔少得，而且岳母大人唔係要晒你，事關新娘子嘅嫁妝，買對龍鳳鈪都十萬八萬，再配埋成套，岳母隨時會蝕畀你呀！」
使費驚人
圈圈講到自己嫁過一樣：「之後就係酒宴，家陣擺酒冇四五十圍都唔見得人，一圍最平嘅都三四千，單係酒宴就要二十萬，仲未計酒水，每枱買支貴價白酒加支名牌洋酒，計落十萬走唔甩，現場布置都唔計啦！仲有唔少得租花車，唔係一架，而係一隊十幾架，加埋現場婚禮攝製隊，唔係一個攝影師，係成隊拍劇咁至有台型，新人嘅結婚禮服同婚紗，蜜月旅行，之前嘅婚紗攝影等，加落百幾萬呀！你話兩百萬邊度夠！」睇吓你哋邊個仲敢娶老婆！
圈圈Profile
年齡：21歲
三圍：34.5-24-35
撰文：小德
攝影：阿昌