中環出更：梁高美懿 做慈善去到盡
本地一齣跳舞電影嘅對白「為咗理想，你可以去到幾盡？」成為一時潮流金句，原來一眾名人為慈善一樣可以去到好盡。其中向來予人高貴形象嘅恒生銀行前女大班梁高美懿（Margaret），雖然往年為慈善機構籌款出錢又出力，但始終冇乜驚喜。原來過去喺銀行界好打得嘅佢都鍾情舞台演出，仲話如果觀眾唔介意佢矮，反串做男人都仲得，總之為慈善，要佢扮乜都得！
日前有慈善機構舉行酒會，一眾樂善好施嘅政商界名人雲集慶祝，其中籌款騷嘅常客Margaret亦有現身。
稱籌款「扮乜都得」
不過，Margaret往年都係打吓高爾夫球、參加慈善步行「撲水」，似乎冇咩新意喎，有冇諗過開金口唱歌增加籌款「叫價力」呢？Margaret謙稱唔想唱歌趕客，舞技亦被一眾社交界舞王舞后比下去，無謂獻醜咁話。
不過講起戲劇，Margaret即時雙眼發光，笑言過去冇人向佢招手，所以一直收收埋埋冇人知佢呢方面嘅喜好，坦言若果有機構邀約佢，可以「扮乜都得」咁話，因為反正都係玩之嘛！Margaret開到聲，相信好快有團體爭相向佢招手。咁啱鐘錶界老行尊孫秉樞都在場，原來佢亦係慈善界嘅老行尊，多年來兼任多個慈善團體嘅管理層，唔知佢會否考慮搵Margaret合作搞吓舞台劇籌款呢？
至於唱英語粵劇最耍家嘅香港賽馬會前主席陳祖澤（John），過去為咗籌款已經多次扮包青天、清兵，連女人都扮過，所以扮嘢一向難佢唔到。阿John仲承諾為咗慈善，唔介意多啲嚟密啲手，密密扮嘢籌多啲善款。而香港足球總會名譽副會長余錦基就話，舞台演出唔係咁啱佢，上台獻唱兩首金曲都仲得，總之為慈善，大家都樂意有錢出錢，有力出力咁話。
卓妮