香港空氣質素惡劣，港府成日賴內地，話受到珠三角工業廢氣影響喎。事實係咪咁呢？嗱，口同鼻拗，根本唔可能有結果，功夫茶只知道風水輪流轉，依家輪到內地投訴香港污染佢哋嘅空氣喇，你話係咪搞笑吖？
件事係咁嘅，前晚深圳上空飄散一股刺鼻嘅塑膠燒焦異味，嚴重影響空氣質素，異味隨後逐漸瀰漫，羅湖、福田、南山、寶安等區都聞得到，當地居民備受困擾，紛紛向當局投訴。後來深圳官方查明異味來自香港，懷疑係打鼓嶺垃圾場起火，要求當地居民關好門窗，唔好長時間逗留戶外，以免健康受損。而港府後來亦證實，打鼓嶺一個電子廢品回收場起火，異味隨風飄向內地喎。
唉，一個回收場起火，搞到烏煙瘴氣，連深圳居民都受到毒氣影響，香港臭名遠揚，簡直失禮死人。大家咪以為今次只係個別事件吖，本港回收場火警已經係家常便飯，見怪不怪嘅喇。呢，上個月之嘛，元朗八鄉橫台山一個存放大量汽車零件及車胎嘅回收場發生三級大火，火勢猛烈且發生多次爆炸，毒煙沖上雲霄，連村屋都被熏黑，三十幾名居民要緊急疏散，都唔知幾狼狽。
唔講唔知，近來回收場頻頻起火，每年都有十宗八宗o架。有人可能認為回收場火警造成嘅損失及破壞有限嘅啫，其實，回收場堆放大量塑膠、舊電器、舊車胎甚至化學品，一燒着就會釋出大量有毒濃煙，經濟損失事小，破壞空氣及環境事大。仲有吖，消防員救火時經常會接觸到毒氣，隨時影響健康o架。
係呢，點解回收場咁易發生火警？講嚟講去咪又係港府監管不力囉。當局口口聲聲重視環保及回收業，前朝貪曾政府仲將環保列入所謂六大優勢產業添，點知到頭來得個講字。咁多年來，當局嘅環保政策亂七八糟，對回收業冇監管冇規劃，一切放任自流，搞到連合適嘅地方都唔夠，唔少回收場又冇水又冇喉又冇牌照，點可能唔七國咁亂吖。舊年屯門龍鼓上灘一個塑膠回收場發生三級火，消防員居然要接駁八百米喉抽海水灌救，問你服未。
計功夫茶話齋，如果港府肯花啲心機，推出適當政策配合，回收業唔只大有可為，仲可以減少垃圾，減輕堆填區壓力添。弊在港產官僚一向吹水唔抹嘴，淨係識得話堆填區就快爆棚，一時話要擴建，一時又話要加強源頭減廢，做好廢物回收，點知講就天下無敵，做就無心無力。唉，港府連自己嘅事都搞唔掂，仲好意思賴內地拖累香港空氣質素，究竟知唔知個醜字點寫o架！