中環出更：沈運龍戴鑽領針省招牌
鑽石魅力無法擋，咪話女人嗒晒糖，堂堂大男人一樣難抗拒。日前卓妮見到中華廠商聯合會會董、古珀行珠寶總裁沈運龍（Aaron），佢喺西裝領上穿戴一粒鑽石領針，品味好獨特。原來呢粒領針係佢自家專利設計產品「冠玲瓏」，年初仲獲得品牌發展局頒授香港名牌稱號，難怪佢要時刻戴住省招牌。
設計獲世界專利
Aaron縱橫中東市場三十幾年，笑言初時做沙石，後來做鑽石，仲話要數「中東通」，前滙控主席艾爾敦認第一，佢就認第二。Aaron點子多多，入行廿幾年接連推出好多獨特珠寶品牌，「冠玲瓏」係其中之一。
呢個取得世界專利嘅產品，奧妙之處係採用「六托一」懸浮設計，中間主石喺六粒較細嘅鑽石擁拱下懸浮突起，營造出比卡裝鑽石更璀璨耀目嘅效果，至今已有逾三千款擁有「冠玲瓏」專利設計技術嘅鑽飾。
卓妮問佢戴住嘅領針價值幾多，佢含蓄笑答：「平到你唔信！」原來約莫係卡裝鑽石嘅十分之一，約四千港元，認真係貪靚女士嘅福音喇！