瘋狂波士反轉紐約人

紐約人老細杜蘭（James Dolan）出名係控制狂，去季就曾經試過裝咪竊聽安東尼（Carmelo Anthony）。呢位瘋狂班主最近變本加厲，除打爛啦啦隊飯碗之外，更被踢爆派人跟蹤教練活臣（Mike Woodson）。瘋狂波士搞到球會上下人人自危！

以衝擊總冠軍為目標嘅紐約人，開季頭4戰輸足3場，嬲到震嘅老闆杜蘭竟然搵球會啦啦隊Knicks City Dancers出氣，向一眾女Dancers表示「睇見都眼冤」，並勒令向觀眾掟Tee取代跳舞環節，變相令啦啦隊「冇得撈」。

杜蘭係咪黐咗線？仲未算！據《今日美國》爆料，原來杜蘭除無故要求教練活臣辭退經理人加斯（Keith Glass）之餘，仲係上季開始就派人跟蹤活臣，上至帶隊領軍，下至喺球場更衣室通道同親朋戚友寒暄，全程都畀杜蘭嘅「狗仔隊」跟到實，可說毫無私隱可言，更搞笑嘅係全隊上下都唔知道杜蘭動機係咩。

上季因為情緒問題畀杜蘭裝咪竊聽嘅安東尼，眼見老闆就快逼死一班手足，前日召開緊急會議穩定軍心。「甜瓜」尋日就攻入全場最高嘅28分，加上巴格蘭尼（Andrea Bargnani）亦有25分進帳，帶領紐約人作客以101比91擊敗山貓止血，為周一凌晨主場硬撼馬刺一仗注入強心針。

（周一凌晨1時開賽）