中環出更：廚魔扮女僕 下身好舒服
同星級名廚Harlan Goldstein鬥減肥籌善款，結果以八磅之差輸咗嘅「廚魔」梁經倫（Alvin），前晚兌現承諾，到Harlan及國際小母牛香港分會籌款委員會主席杜振源（Simon）開設嘅餐廳做一晚女侍應。肉感十足嘅Alvin着上黑色吊帶短裙配襯白色圍裙，女僕扮相勁銷魂。Alvin搞笑話，着上性感女服後，下身感覺前所未有咁涼快喎！
當晚有四十幾位城中名人齊去見證Alvin嘅女僕風采，一入場就被Alvin搞笑造型吸引，個個爭住同佢影相。難得名人咁捧場，Simon就出動大炮裝靚紅酒及矜貴白松露宴客，座上客包括立法會議員梁君彥、林健鋒、靚仔醫生莫樹錦及馬會大董葉澍堃全家。至於兩位名廚就滿場飛，逐一為賓客刨白松露。
為慈善犧牲色相
不過，女僕Alvin就更加忙，事關佢用檸檬裝假狗，胸前每邊裝兩、三個檸檬，點知啲檸檬經常走位，搞到佢周身唔聚財，後來索性當眾摷胸執返好啲檸檬，認真搞笑。佢話，最好有大大粒嘅西柚代替，就唔使咁論盡喇！
Simon話，佢應承如果Harlan勝出，即捐出十萬元，加上Harlan贏得各方好友嘅賭注數萬元，今次總共湊夠十七萬元善款捐畀小母牛，當晚就由身兼小母牛香港分會副主席葉澍堃代表接受大支票。
今次為期三個月嘅賣肉對決，Harlan共減去四十五磅，而Alvin就減咗三十七磅。兩位星級名廚瘦身成功，重拾健康。不過，莫樹錦醫生提醒，減肥最好循序漸進，如果太快就好易患上抑鬱症喎。
卓妮