中環出更：黨友疑倒戈 「范」眾憎？
新民主同盟立法會議員范國威（Gary）有份嘅「香港本土」，早前因為刊登「源頭減人」廣告，兼且要政府收回內地單程證審批權，因而被人批評歧視新移民，搞到泛民主派上星期都要發出聯署聲明劃清界線，話反對歧視內地新移民。泛民嘅聯署聲明內嘅聯署人，除咗之前我哋報道過嘅新同盟丘文俊同容溟舟外，尋日仲傳出消息，新同盟執委會已經通過加入泛民嘅聯署聲明，唔通Gary真係眾叛親離？
大佬文化捱批
Gary就澄清話，執委會內部只係傾緊簽唔簽泛民聯署聲明，相反上星期六就議決會簽「香港本土」聲明，強調執委會並唔認為「源頭減人」廣告有問題喎。
不過，佢哋嘅大埔區議員關永業認為，雖然雙方都合理，但Gary立場可以寫得婉轉溫和啲，日後用「源頭減人」呢啲字眼都要小心啲，費事被人作口實話係歧視。有新同盟中人又批評，聯署呢件事顯露大佬文化，鬧Gary自以為是，無可救藥。
話時話，以前Gary喺白鴿黨時，作為少壯派嘅佢經常狠批黨高層嘅大佬文化，如今真係現眼報囉！
卓妮