中環出更：大劉發脾氣 手指指保安
捲入澳門世紀巨貪案嘅華人置業主席「大劉」劉鑾雄尋日又去到灣仔嘅名人飯堂食晏，對於現場記者嘅提問，佢一如既往扮聽唔到。但係尋日佢就忽然躁底，對保安員發脾氣，佢手指指面露埋怨之色，不知所為何事。
一直聲稱有病拒絕出庭應訊嘅大劉尋日中午十二點又坐車去灣仔食晏，不過就得佢自己一個，唔見有其他人陪同。着住深藍色風褸嘅大劉一落車就急步行去酒家，三名保安員一早已企定定守候。
頭耷耷拒答記者提問
巨貪案聽日會喺澳門初級法庭續審，在場記者梗係要問下大劉會唔會出庭啦，不過佢又係頭耷耷唔出聲，行到入酒家嘅升降機大堂時，更忽然向保安員手指指發脾氣。
大劉食晏食咗差唔多兩個鐘之後就離開酒家，記者就諗住關心下佢問佢點解發脾氣、最近身體狀況點樣同心情好唔好，不過佢都係一支箭咁衝咗上車，冇答記者問題。
卓妮