政情：公文袋一盤散沙
花名公文袋嘅公民黨喺今屆立法會選舉成功取得六席，除咗較上屆多出一席之餘，仲好巴閉咁攞晒五個地區直選議席。雖然公文袋喺議席數目上有所增長，但黨內不和程度逐漸白熱化，不時傳出某人唔妥某人，部分黨員又會公開單單打打，嚴重影響黨內團結，喺立法會內完全無晒隊形。
上屆立法會公文袋雖然只有五席，比全盛期有九席嘅民主黨少成差唔多一半，但五位議員全部都係大狀出身，起碼講起上嚟都同聲同氣，唔會不時互插玩分化。縱使湯家驊喺上次政改方案上唔同意公文袋參加五區總辭，甚至揚言會退黨以示不滿，但大家最後起碼都和氣收場，眾人更加唔會因為湯家驊立場同黨立場不同而杯葛湯家驊。
陳家洛毛孟靜面左左
不過時至今日，公文袋喺立法會得番三個大狀，其餘有傳媒出身嘅毛孟靜（阿毛）、學者做議員嘅陳家洛，同埋新加盟嘅郭家麒醫生。依家幾個立法會議員不時雞同鴨講，搞到內部愈嚟愈唔協調，先有陳家洛同毛孟靜因四川賑災撥款鬧交鬧到出晒面，兩人喺立法會時「面左左」，後有陳家洛同郭家麒同期去信食物安全及環境衞生事務委員會，要求委員會跟進違規冰鮮肉店個案，兩個同黨議員爭嘢做，再次凸顯黨內溝通不足。
直至最近，阿毛以「香港本土」名義喺報章刊登提倡「源頭減人」嘅聯署廣告，即時畀各大黨派圍剿鬧佢歧視新移民。泛民其餘議員隨後發表另一聯署聲明，呼籲社會要以包容、公義嘅原則對待新來港人士，公文袋黨魁梁家傑（Alan）雖然無開口批評黨友，但佢都有份參與聯署，似乎一切盡在不言中。
黨魁梁家傑無能為力
據聞依家公文袋每次開執委會時，幾位不和議員都會先自說自話，繼而互寸窒爆對方，見到大家嘅不和已經浮晒上枱面，主持會議嘅Alan都無從入手唔知點處理。公文袋現時一盤散沙已經係不爭嘅事實，再係咁落去，就唔好再話成功爭取普選後，某某黨員會去選特首喇。