中環出更：以前靠養動物畫神態 盧清遠：依家上網睇
文化博物館為嶺南派畫家盧清遠，舉辦為期半年嘅作品展。盧清遠係嶺南派第二代大師趙少昂嘅得意門生，佢嘅作品自然承襲咗濃厚嘅嶺南派風格，譬如強調兼工帶寫、彩墨並重、注重實物觀察同寫生體驗，而題材則以花鳥、蟲魚同走獸為主。
為咗描繪得形神俱備，盧清遠話過往好多畫家都會飼養動物以便仔細觀察，蜚聲國際嘅已故國畫名師張大千，佢嘅二哥張善子為咗將老虎畫得神似，就喺家中飼養老虎。然而猛獸唔係人人敢養，趙少昂就手持寫生簿到動物園，捕捉飛禽走獸嘅動作同神態，其實趙少昂亦曾養過一隻雀仔十多年直至壽終，更為已死嘅雀仔繪畫遺像以抒發不捨之情。
梁天富借收藏品畀博物館
盧清遠早年亦飼養唔同品種嘅魚類同觀賞鳥，但有次為咗畫貓頭鷹，於是就買咗隻貓頭鷹返屋企，並以雞頸嚟餵飼，無奈貓頭鷹係專食活老鼠，飼養約莫半年就溘然長逝，而近年喜愛以鷹為繪畫題材。咁有冇養隻鷹呢？佢話依家上網就有大量野生動物嘅影片供深入研究，又大讚資訊科技為畫家帶來好多方便。
今次畫展，有相當數量嘅作品係由善德基金會總理、收藏家梁天富所借出。梁天富過去因經營展覽業嘅關係，得以見識到盧清遠畫作水平之高超，於是就積極搜羅趙盧兩師徒嘅作品，佢認為藏品與其嚴格保管不見天日，倒不如借畀博物館公諸同好，藏品又可得到專業保存，可謂利人利己。
中文大學新亞書院榮譽院務委員何文匯，憶述三十年前打算喺新界區成立一間具藝術館功能嘅博物館，然而央求藝術家捐出作品，人家就問有無場地；問政府要場地，對方就話要先有藏品。後來因盧清遠率先捐出畫作，先至得以打破「雞與雞蛋」嘅困局。如今目睹文化博物館展出盧清遠作品，令佢深感是次展覽有其特殊意義。
卓妮