政情：「狀元車長」升呢 被質疑未夠班

今年廿六歲嘅梁領彥，○三年會考後拔尖入中文大學讀計量金融系，畢業後入會計師樓做經理，一個月有幾萬元人工。不過，佢做得好辛苦，經媽媽勸解索性辭職追夢做車長。領彥加入九巴做車長之後，有粉絲專程搭佢揸嘅巴士，但最近網上就盛傳佢「唔撈」，可能轉做文職。

下月起兼做路線策劃

我哋問過九巴，佢哋話領彥唔係唔做，反而下個月一號會做多瓣，就係路線策劃，九巴話佢對上一份工嘅經驗同技能可以應用喺新工作。有工會中人就唔係好認同，認為路線策劃向來係車務主任或者經理負責，根本唔關車長事，質疑呢個安排只係賣廣告喎。