政情：請食龜苓膏張宇人幫議員「解毒」
自從龜苓膏無龜呢單新聞出街後，鬍鬚佬吳耀明間龜苓膏店生意受到影響。好彩海關前幾日公布測試，證實鬍鬚佬啲龜苓膏有龜嘅成分，總算還佢清白。飲食界立法會議員張宇人（Tommy）為咗幫業界，尋日自掏腰包買咗百幾盅龜苓膏返立法會請議員食，唔通佢都覺得班議員「太毒」，要食龜苓膏解毒？
國興搶先食 仲偕交足戲
原來Tommy諗住請班議員食龜苓膏，藉此幫鬍鬚佬間舖澄清謠言。難得免費有嘢食，班議員都好幫手，工聯會王國興就搶先食頭一盅，佢話企喺打工仔嗰邊，為咗唔想見到有店舖倒閉，當然要親自試食龜苓膏，增強市民信心喎。
至於議員單仲偕見到盅龜苓膏時，都睇清楚係咪「涼粉」，又話自己唔鐘意食「涼粉」，嫌佢無功效，當Tommy話呢盅係百分百龜苓膏後，佢亦識做交戲，幾分鐘內就食晒盅龜苓膏。不過，要市民對龜苓膏恢復信心，睇怕都需要一段時間。