中環出更：汪圓圓嫁衣撐本地設計
積極推動本地創意及設計工業嘅香港傳藝中心，早前舉行「香港傳藝節．仁濟慈善晚宴」，為榮獲「十大傑出設計師大獎」等獎項嘅設計家頒獎，同時連續第八年為仁濟醫院籌款。香港傳藝中心校長吳子文、仁濟副主席蘇陳偉香、太子珠寶鐘錶主席鄧鉅明夫婦、名媛陳燭光（Zandra）及周國豐夫婦等城中名人齊現身，十分熱鬧。
丘雪祺包辦晚裝裙褂
即將於十一月披嫁衣，同「玩具大王」蔡志明嘅囝囝蔡加讚（Karson）拉埋天窗嘅汪圓圓，都去支持攞獎嘅時裝設計師丘雪祺（Cecilia），仲爆料話搵Cecilia為佢嘅世紀婚禮設計晚裝及裙褂，實行以行動支持本地設計。圓圓透露，到時佢會着傳統嘅裙褂，但晚裝唔會訂造太多套，事關佢唔想換太多次喎。
Karson事先張揚將婚禮籌備大權交畀圓圓，咁婚禮係咪佢夢想咁樣？圓圓笑笑口話，以前佢的確覺得一生人結婚只得一次，自然要追求完美，但依家就覺得最重要係人，同家人及去見證婚禮嘅賓客享受晚宴，才是婚禮重點。咁決定去邊度度蜜月？圓圓甜絲絲話：「由加讚決定，我同佢講，你決定去邊，我都跟住你！」真係幸福滿瀉。
Cecilia就盛讚圓圓身材好完美，佢唔止幫新娘設計旗袍、裙褂等晚宴禮服，仲包辦汪家父母及合共二十位兄弟姐妹團禮服嘅設計，佢笑言好緊張，因為自己都係姐妹團成員之一，面對咁多靚仔靚女，自己更加要努力保持最佳狀態至得。講開婚禮，Zandra最近就搞咗盤新娘化妝及影相生意，難怪戴住花花頭箍、打扮得咁夢幻出席晚宴喇。
卓妮