中環出更：嚴重光再駐港 駕輕就熟
台灣駐港機構早前高層人事大執位，最近各個空缺已陸續有新人填補，其中曾任經濟部駐港機構遠東貿易中心主任近六年嘅嚴重光，就重返香江擔任台北經濟文化辦事處新任處長，所以一切駕輕就熟。
巫宗霖讚港效率高
嚴重光日前同另一新上任嘅台灣觀光協會香港辦事處主任巫宗霖，齊齊現身為台灣食品展撐場，嚴重光話，暌違香港三年半，覺得最大不同係「多咗好多人」，尤其是旺角、銅鑼灣鬧區，周圍都係人，話可以有利於推廣台灣旅遊及貿易喎！
至於由馬來西亞派來香港嘅巫宗霖，就對香港出晒名嘅高效率大開眼界，事關佢預約電訊公司到屋企安裝寬頻網絡，估唔到兩日就搞掂，對比之前佢派駐大馬期間，預約安裝竟然要等六個星期，真係差天共地。
當日同場仲有遠東貿易中心主任陳光丕及台北貿易中心主任孫至誠，佢哋今次精選台灣過百種具代表性嘅農漁產品展銷，其中茶葉係重點推介項目，至啱鍾意品茗嘅香港人。
卓妮