中環出更：趙麗娟樂做「會計界紅娘」
會計師嘅職責係計好盤數兼妥善理財，日日對住一堆密麻麻數字，其實都幾悶。會計師公會會長趙麗娟（Susanna）決意打破悶局，興趣多樣化嘅佢，喺公會內舉辦多個興趣小組，更聯同其他專業界別舉辦聯誼活動，當中成功撮合唔少姻緣，慢慢成為「會計界紅娘」。身為單身貴族嘅Susanna，雖然未有從興趣中搵到另一半，但賺來嘅友誼，比愛情更難能可貴。
籲單身女性勿怕嫁唔出
Susanna坦言，年輕時因種種原因錯過數段姻緣，但佢從無後悔，與前男友仍保持好友關係，將以往嘅美好回憶埋藏心中。縱使單身，佢仍活得自信充實，鼓勵單身女性唔好怕嫁唔出，最重要係先了解清楚自己要啲乜，而佢追求嘅係友情、親情同貢獻社會嘅滿足感。不過，佢亦唔抗拒愛情：「我好信緣分，遇到志趣相投嘅人，我都會結婚o架！」
講到嗜好，Susanna話最愛攝影，佢憶述幾歲大嗰陣，爺爺買咗部傻瓜機畀佢，佢就由朝到晚拎住部機周街影，仲偷偷哋走入嫲嫲間房當「黑房」曬相，搞到一陣藥水味。至於佢嘅另一強項係跳舞，特別係拉丁舞，至今定期與同業組隊參賽。
適逢今年係會計師公會成立四十周年，Susanna透露，未來將搞搞新意思，帶領一班「會計大使」義工，為非政府機構提供理財評估及諮詢，令機構營運更有效率。同時公會年前亦開始走訪中、小學，向學生灌輸正確理財觀念。
卓妮