政情：中策組怨氣沖天
中央政策組又惹火頭！我哋尋日先至報道過出名火爆嘅中策組首席顧問邵善波（波叔）與學術界關係麻麻，點知發現原來中策組內部同事之間嘅關係都係麻麻哋。我哋日前收到一封疑似「鬼信」，指名道姓批評中策組一名官員講粗口、欺壓下屬又冇領導才能，仲借故虛報工作時數，申領補假同OT津貼添。中策組由內到外都呈現亂象，睇嚟波叔都要諗辦法穩定吓軍心至得喇。
呢封疑似「鬼信」嘅主人熟悉政府內部運作，識得致函政務司司長辦公室及公務員事務局等「對口單位」，指控句句到肉之餘，仲教精部門只要查證嗰位官員嘅工作時數同補假申請就一目了然，似乎想摧毀對方嘅仕途咁款。
疑與龐大工作量有關
不過，當事人隨即向我哋澄清，除咗否認所有「呃鐘」、「呃錢」嘅指控，仲批評「鬼信」內容無的放矢，更有誹謗之嫌。當事人唔清楚投訴人嘅背後動機，但估計同中策組嘅龐大工作量有關。
咪以為中策組冇乜戰績一定好歎，但據聞中策組長期缺乏人手，唔少員工不但晚晚加班，每年施政報告出爐之前更加係有開工、冇收工，甚至一星期返足七日。其實政府處事官僚眾所周知，所謂超時補假都係由上司監督，補水就更加好耐冇呢支歌仔唱，所以官員要撈油水並唔係咁易；而辦公室人事權鬥引伸出「鬼信」亦唔係新鮮事，但「鬼信」就道出中策組以至政府部門嘅哀歌。
不過，有一點可以肯定嘅係，特首梁振英（CY）一年前上任時雄心壯志話要籌組「香港營」，可惜至今依然各據山頭、各懷鬼胎，而波叔想招攬學者出謀獻策又困難重重，加上中策組工作吃力不討好，搞到內部怨氣爆燈兼鬼打鬼。
亂象紛呈 急須解決
奉勸波叔都係先安內、後攘外，否則中策組內部都自亂陣腳，難免影響研究同民調嘅質素，仲分分鐘令政府添煩添亂，咁到時可能真係承部分議員嘅「貴言」，解散中策組都得喇。