政情：中環出更：孫公夫婦 眼鏡顯長情
前教育局局長孫明揚及太太鍾小芬出晒名恩愛，尤其是孫公退休後，兩人經常有影皆雙。早前有日下午大約三點，孫公夫婦十指緊扣喺中環皇后大道中現身，沿途有講有笑，輕輕鬆鬆直入萬邦行二樓一間眼鏡店。兩人一入去，孫公就企喺櫃位前，店員好熟練咁攞兩副眼鏡出來畀佢試戴，睇嚟佢哋係熟客。
經過簡單嘅調校後，不消幾分鐘，店員就搞掂孫公嗰副眼鏡。接住輪到孫太坐低試戴，話咁快就調校好晒，孫公兩公婆睇嚟好滿意，即刻戴住新簇簇嘅眼鏡離去。驟眼望去，卓妮仲以為佢哋佩戴情侶眼鏡，不過望真啲，其實都有些少唔同嘅。
30年都幫襯同一間店
孫太話，佢哋係去配可隨陽光強弱而變色嘅漸變眼鏡，佢仲讚孫公好啱戴有框眼鏡，顯得後生又靚仔，氹到孫公笑呵呵。話時話，佢哋幫襯嘅眼鏡店已開業幾十年，孫公幫襯都有三十年，咁多年來無論間店搬去邊，佢哋就跟到邊，好長情。當日佢哋配嘅係名牌鏡架，一副都要五、六千元o架！
講起最近政府收緊政治委任官員嘅利益申報指引，孫公話，其實官員利益申報一向有機制，如果按正常規定清清楚楚申報，就唔會有問題。
一提起政治，孫太就唔想孫公講太多，寧願講吓風花雪月就算。孫太話，佢哋兩公婆都已退休，無嘢做，所以經常周圍去，佢就啱啱同孫仔去日本玩。不過今次孫公冇跟住去，留喺香港休息喎！
卓妮