中環出更：秋冬忽冷忽熱 玩殘時裝業
今年香港冬天暖笠笠，令秋冬裝銷情好慘淡。做時裝生意嘅立法會議員田北辰（田二少）、仁濟醫院主席林煒珊（Vanessa）與立法會紡織及製衣界議員鍾國斌（Felix），不約而同大呻被反常天氣玩殘。咁啱近期天氣終於凍番啲，相信係時裝及零售業界扭轉劣勢嘅好時機。
仁濟醫院早前舉行慈善盆菜宴，可惜遇上氣溫驟降兼落雨，搞到大家要一手擔遮一手舉筷，好狼狽。不過，田二少就話唔掃興，事關佢已等咗寒冷天氣好耐喎！佢話，今年冬天創下百多年來最暖紀錄，導致禦寒衣物乏人問津，其公司銷路亦大減。為咗子孫後代着想，佢話就算為環保付出些少經濟代價，計落除笨有精，因為天氣凍不但可刺激服裝銷路，餐飲業亦會受惠。
鍾國斌獻計：做薄啲衫賣
家族亦係做服裝生意嘅Vanessa都話，受到佔領行動及反內地客嘅衝擊，時裝零售業已經好艱難，點知今年又遇上暖冬，令到冬衣滯銷，惟有寄望今年餘下嘅日子生意會好番啲。仁濟醫院總理葉恭正（Paul）都有出席盆菜宴，雖然Paul鍾愛嘅賽車運動並唔環保，但佢話電動方程式漸趨普及，總算係賽車運動邁向環保嘅新方向。
卓妮喺另一場合見到Felix，佢都呻話秋裝賣唔出，業界都好難過，佢自己做出口，情況就好少少。不過，歐洲天氣都唔係咁凍，有成十幾度，計仔多多嘅Felix就未驚過，話啲衫做薄啲就得嘞！唉，氣候暖化好似停唔到咁，唔知過多幾年，Felix使唔使冬天都賣短袖衫呢？到時影響可能更大，睇嚟各界都要支持減排至得啦！
卓妮