政情：陳維安再做公僕講佛偈
立法會新秘書長陳維安（Kenneth）上周六正式上任取代吳文華（Pauline）成為回歸後立法會第三位秘書長。做過教育局副局長嘅佢尋日同傳媒茶敍時，唔肯承諾唔會重返政府，但就話希望任內可以見證立法會所有議員由普選產生嘅歷史性一刻。佢又引用佛偈「放低就係放低」，話離開舊崗位後唔會再講以前嘅事。
前秘書長Pauline對住社民連梁國雄放氣球都可以輕鬆對付，Kenneth尋日都講笑話Pauline臨走前都擔心佢會畀新議員蝦，但佢就唔相信議員會特別為難佢。佢打算主動去議員辦公室同各政黨總部逐一拜會佢哋，令新議員可以放下戒心同佢傾偈。
Kenneth又話，雖然自己一早熟讀《議事規則》，但仲有好多嘢需要時間慢慢睇慢慢學，嚟緊最大挑戰係要理解立法程序嘅背後慣例同應用原則。佢又話今屆立法會七十位議員令翻譯部及法律部同事工作量大增，秘書處之後除咗要諗吓星期四係咪要多開半日會外，仲要考慮增聘人手應付需求喎。