政情:北韓射衞星 徐英偉囉囉攣

候任特首梁振英嘅司局長班子基本完成,物色副局長同政治助理將會係下一步工作,民政事務局政治助理徐英偉(Caspar)喺一眾政助中表現較有口碑,又願意同不同持份者打交道,坊間都預料只要佢願意的話,應該「有得留低」。Caspar早前被問及去留時冇正面回應,僅稱會繼續做好手頭上嘅工作喎。

Caspar去留依家仲係未知之數,佢早前放假去充電,上月中同太太到日本沖繩玩咗幾日,適逢當日正值北韓發射衞星前夕,Caspar同太太事前都望天打卦,密切注意情況,好在最後個衞星喺佢哋出發前已發射,佢哋先可以無後顧之憂去玩。

Caspar話,佢依家周末不時要出席地區活動,佢太太就會喺附近行吓街,等佢出席完活動後就一齊食嘢同周圍行吓,唔知Caspar下次再出席地區活動時,會否索性夫唱婦隨,實行有影皆雙呢?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報