政情：陳嘉華過檔 fb充「紅娘」
豪華飲食集團太子爺陳嘉華（Jeffrey）為咗參加下屆區議會選舉，疊埋心水放低酒樓工作，加入經濟動力後，更密密落區。Jeffrey透露，佢之所以加入經濟動力，全靠交友網站facebook呢個「紅娘」。話說組織核心人物林健鋒早前喺facebook睇到當時仲喺新民黨嘅Jeffrey留言，得悉佢想退黨，於是乘機向佢招手。
Jeffrey坦言，自從加入經濟動力之後，發展空間多咗，有機會參與地區工作，仲初嘗街頭「嗌咪」嘅滋味。佢話組織都好重視佢，雖然佢仲未係區議員，但就畀佢做新界東支部副主席，負責擴充新東版圖，依家支部已有至少八名樁腳，佢希望繼續用互聯網嘅影響力，廣納賢能，近日佢就成功游說到離島東涌北區議員林悅加入。雖然離島屬新界西，但為個組織成功招攬新人，都係好事。