人民力量一早已講明會拉布，政府其實有辦法化解，但佢哋遲遲唔肯抽起出缺安排條例草案，搞到排喺後面嘅法案塞晒車。政壇盛傳嘅陰謀論話，煲呔曾樂見立法會拉布愈拉愈長，因為喺拉布之下，立法會可能無時間處理新政府架構，於是候任特首梁振英上任時就唔可以風風光光咁去推行新政策，因為推行新政，就即係打煲呔曾一巴。
陰謀論仲話煲呔曾唔介意本來要喺呢個立法年度處理嘅草案留畀下一屆，競爭法、規管銷售一手樓等法案，全部係針對工商界，今屆會期搞唔掂，下屆又要重頭開始，唔止費神失時，仲可以將佢自己嘅舊包袱，加諸新政府。拉布嘅議員，知唔知政府裏面有一位咁好嘅合作夥伴呢？