政情：翁以登先祖顯赫晚清
香港總商會前行政總裁翁以登（Eden）向來都與商界關係密切，年前當佢出任科技大學副校長，好多人都感到錯愕，但其實翁以登與教育係頗有淵源，原來Eden踏足商界之前曾執教鞭，父親係以教書為業。而著名嘅晚清權臣，光緒皇帝嘅老師翁同龢亦係佢嘅先祖，可謂書香世代。
歷史上翁同龢顯赫一時，曾任工部及戶部尚書、軍機大臣及總理衙門大臣，又係光緒皇帝嘅老師，更影響到晚清時局。對於呢位咁威水嘅先人，翁以登自認係翁同龢嘅第六代，不過佢好慚愧未能傳承翁同龢嘅一手好書法。佢話先祖係讀書人出身，家族中人都十分重視教育，例如Eden已故嘅父親生前喺美國做教授，而佢又曾經喺位於科羅拉多嘅美國空軍大學任教數學。
翁以登話由於喺香港總商會擔任總裁長達九年，所以就予人強烈嘅商界印象從而忽略咗佢嘅教學經歷。佢又話每當欣賞科大嘅無敵靚海景，就不期然回想起空軍大學所擁有嘅壯麗山景。