政情：包陪麗推崇筆的藝術
生產全球第一支有品牌鉛筆嘅Faber-Castell，為咗紀念成立二百五十周年，尋日舉行《筆的藝術》展覽，仲邀請咗已故船王包玉剛三女包陪麗（Cissy）蒞臨主禮。身為藝術中心監督團主席嘅Cissy話，近期太忙冇執畫筆，希望遲吓有時間再創佳作喎。
尋日Cissy由上海公幹返港，未見絲毫疲態。Cissy對現場展品好感興趣，尤其欣賞德國藝術家用數千支鉛筆砌成嘅啫，童心未泯咁舉起相機影個不停。佢話自己係該品牌嘅忠實粉絲，貪佢質料一流，畫出嚟嘅畫特別靚。喺現今科技先進嘅年代，唔少人都以電腦代替畫筆，佢覺得好可惜，事關手繪畫先至有靈魂喎。
抽象水墨油彩畫家朱楚珠（Nancy）都嚟湊熱鬧，佢話平時喜歡周遊列國，去吓風景區、博物館咁，增添繪畫靈感。嚟緊佢會去美國芝加哥同紐約睇畫展，相信冇幾耐又會有佳作出現喇。