現屆立法會議員張學明同前沙田區議會主席韋國洪先後被西環勸退，兩位沙田區議員葛珮帆（EQ）同龐愛蘭（Scarlett）順利遞補，可以喺九月參加新東立法會直選。雖然係咁，有消息就話，佢兩個其實未夠票，有機會雙雙戰敗咁話。
消息透露，新東鄉事派嘅票其實已經被西環撥咗去唔同人身上，其中沙田、坑口同西貢鄉事票都被要求過晒畀EQ，雖然係咁，EQ依家計落都仲係難言穩勝，全因佢同Scarlett票源重疊，加上形象唔明確，結果就搞成咁，就連EQ都好徬徨，要四出求救。
Scarlett亦唔好得幾多，雖然佢已經嫁入公民力量，主要攞沙田票，只不過距離拎到一席仲係爭啲。據講，公民力量今日約咗鄉事派食飯，但睇嚟好難力挽狂瀾。呢位地區人士話，兩位女士互相吸票，加埋自由黨榮譽主席田北俊，以及西貢區議員方國珊，隨時令泛民無端端拎多一席喎。