政情：施祖祥查貪 拒徇私特首
深受歡迎嘅前新聞主播方健儀最近過檔廉署做高級新聞主任，唔少「方迷」都好失落，不過，大家又可再見「方蹤」，佢喺廉署主持宣傳教育節目，頭炮訪問審查貪污舉報諮詢委員會主席施祖祥。方健儀問咗條尖銳問題，問如果廉署調查牽涉高官、權貴甚至特首，而委員會班成員又係特首委任，咁會唔會出現徇私呢？緊貼住熱門嘅貪曾問題。
施祖祥就話，委員雖然係由特首委任，但唔會徇私，仲話委員會由十二位社會知名人士組成，絕對唔會做橡皮圖章同政治工具，如果委員認識被廉署調查嘅人士，會即時申報利益，唔會收到相關嘅調查文件，開會嗰陣亦會離場！
對於廉署被指高調執法，施祖祥就話，如果調查係牽涉上市公司，由於要向證監會申報同暫停買賣，所以好多時傳媒一早收到風，去晒廉署總部守候，話唔關廉署伙記事喎！