候任特首梁振英（CY）尋日會見十八區區議會主席，特別向佢哋介紹自己政綱所講嘅加強地區行政嘅計劃。有與會主席透露，最初大家都以為CY會硬銷政府架構改組，點知最後一句都冇講，反而當佢聽到現屆政府地區行政最冇效率時，即時皺晒眉頭，擺明好唔滿意。
與會人士透露，CY一開場已經話，如果乜嘢地區事務都要去晒中環處理，政府會吃不消、而且亦冇效率，鼓勵大家多啲就呢方面提意見；據講發言好踴躍，好似沙田區議會主席何厚祥就希望，政府可以就地方人口同土地規劃諮詢區議會，因為各區人口唔可以無限增長咁話。
亦有主席提出，現屆政府工作效率欠佳，例如起個避雨亭竟然搞足兩年；與會人士就話，CY聽到後即時皺晒眉，仲要求該位主席畀多啲資料佢研究改善。
CY總結時仲話，類似問題累積得太耐，政府一定要改進，但就希望大家畀啲時間佢處理。